Kefir bilan ozish: grechka va bitta mahsulotli diyetalar

Kefir bilan ozish mumkinmi? Bir-ikki hafta faqat kefir yoki faqat grechka yesangiz, tarozi tushadi. Lekin bu kefirning kuchi emas — siz shunchaki kam yegansiz. Bunday diyeta tanaga kerakli moddalarni toʻliq bermaydi. Vazn esa odatda tez qaytadi.

Hamkasbingiz maqtanadi: «Bir hafta faqat kefir ichdim, tarozi tushib ketdi!» Siz ham boshlaysiz. Bir-ikki kundayoq kefirni koʻrgingiz kelmay qoladi, lekin chidaysiz. Hafta oxirida tarozi rostdan tushadi. Keyin oddiy ovqatga qaytasiz — kilolar ham ortingizdan keladi. Tanishmi? Nega shunday boʻlishini hozir oddiy qilib tushuntiraman.

Kefir bilan ozish qanday ishlaydi?

Bitta mahsulotga qurilgan diyetani monodiyeta deyishadi. «Mono» — bitta degani. Masalan, bir hafta faqat kefir, faqat grechka yoki faqat olma.

Ularning hammasi bitta yoʻl bilan ozdiradi: tanaga sarflaganidan kam quvvat kiradi. Men doim aytaman: hech bir mahsulot semirtirmaydi ham, ozdirmaydi ham.

Birinchi kunlardagi tez minusning katta qismi esa yogʻ emas. Kam yesangiz, tana qand zaxirasini sarflaydi. U bilan birga saqlangan suv ham chiqib ketadi. Ichakdagi ovqat ham kamayadi. Tarozi esa hammasini tortadi. Odatdagi ovqatga qaytganingizda bu kilolar tez qaytadi.

Grechka-chi? U foydali-ku?

Grechka bilan ozish: tanaga nima yetishmaydi?

Grechka — yaxshi taom. Muammo grechkada emas, «faqat grechka»da. Bir-ikki mahsulotdan iborat ovqat tanaga kerakli vitamin va minerallarni toʻliq bermaydi.

Qattiq cheklovda yogʻ bilan birga mushak ham ketadi. Juda kam yesangiz, ich qotishi, holsizlik va soch toʻkilishi ham boʻlishi mumkin.

Angliya shifokorlari qoʻllanmasi ochiq aytadi: muvozanati buzilgan qattiq diyetalarni qoʻllamang. Ular uzoq muddatda foyda bermaydi va zarar qilishi mumkin.

Bodring bilan ozish mumkinmi?

Bodringning hajmi katta, quvvati kam. 100 grammida atigi 15 kilokaloriya atrofida bor. Shuning uchun ovqatdan oldin bir likopcha bodring-pomidor salati — yaxshi odat. Keyin asosiy taomni kamroq yeysiz.

Lekin «faqat bodring» — bu yana oʻsha monodiyeta. Bitta mahsulot tanaga kerak boʻlgan hamma narsani bera olmaydi.

Darslarimda bodringni pechenye bilan solishtirganman. Shunda ham «faqat bodring yeng» demaganman. Maqsad — kaloriyani tushunish, ovqatni bitta mahsulotga qisqartirish emas.

Nega vazn qaytadi?

Monodiyeta prujinani siqishga oʻxshaydi. Bir hafta faqat kefir ichib, oʻzingizni qancha qattiq ushlasangiz, keyin shuncha kuchli «otilib» ketasiz. Eski ovqat qaytadi. Qiynalib tushirgan kilolar ham birpasda qaytib keladi.

Shuning uchun men diyeta emas, umr boʻyi davom ettirsa boʻladigan odatni tavsiya qilaman.

Qachon shifokorga borish kerak?

• Insulin ishlatsangiz yoki qand tabletkasi ichsangiz. Har qanday diyetadan oldin shifokorga boring. Ovqatni keskin kamaytirish qandni tushirib yuborishi mumkin.
• Homilador yoki emizuvchi boʻlsangiz. Diyeta siz uchun emas.
• Diyeta paytida holsizlik, bosh aylanishi yoki hushdan ketish boʻlsa.
• Ovqat bilan munosabatingiz ogʻir boʻlsa. Avval psixiatr yoki psixoterapevt bilan gaplashing. Masalan, oʻzingizni toʻxtata olmay koʻp yeysiz, keyin och yurasiz yoki ich suradigan dori ichasiz.

Nima qilish kerak

1. Kefir va grechkani tashlamang — ularni oddiy ovqatingizning bir qismi qiling. Nega: ular yaxshi ovqat, faqat yolgʻiz emas.
2. Bitta kichik oʻzgarishni tanlang. Masalan, shirin ichimlikni suvga almashtiring. Nega: kichik oʻzgarish yillab saqlanadi, monodiyeta esa bir-ikki hafta chidaydi.
3. Tez ozishga intilmang. Nega: tez ketgan kilo koʻpincha suv va mushak. U tez qaytadi.
4. Haftada bir marta tortiling va belingizni oʻlchang. Nega: kunlik tarozi suv bilan oʻynaydi. Haftalik oʻlchov esa haqiqiy yoʻnalishni koʻrsatadi.

Yeb-iching, meʼyorni unutmang. Aytish oson, qiyini — kichik odatni har kuni, toʻyda ham, ishda ham davom ettirish. Formula ilovasidagi «Taomlanish odatlari»da bir vaqtda bitta-ikkita odat ustida ishlaysiz. Ilovada tayyor menyu ham, taqiqlar ham yoʻq. Qisqa darslar va har biridan keyin bitta kichik vazifa bor. Natijani saqlashni esa birinchi kundan oʻrganasiz. Monodiyetasiz ozish va qayta semirmaslikni oʻrganmoqchi boʻlsangiz, App Store yoki Google Playʼdan «Formula — ozish ilovasi»ni yuklab oling.

Savolingiz boʻlsa — Telegramʼdagi yordam botiga yozing

Doktor Feruz YigitaliyevFormula ilovasi muallifi

TashMIʼda 10 yil oʻqigan: 6 yil asosiy taʼlim va 2 ta ordinatura. 2021-yildan semizlik va ozish bilan shugʻullanadi. Shu tajriba asosida Doktor Feruz metodi va Formula ilovasi yaratildi.

Doktor Feruz yoʻli

Manbalar

1. NICE. Overweight and obesity management (NG246), 2025. nice.org.uk/guidance/ng246
2. Kreitzman SN va hamk. Glycogen storage: illusions of easy weight loss, excessive weight regain, and distortions in estimates of body composition. Am J Clin Nutr, 1992. doi.org/10.1093/ajcn/56.1.292S